நகர்வலம் - திருச்சிராப்பள்ளி ( பகுதி 3 )

சென்ற நகர்வலத்தின் கடைசி பத்தி: திருச்சியில இருக்கறப்ப எப்பவும் ஊருக்குள்ள பஸ்லதான் சுத்தறது, அப்டி சுத்தரப்ப நான் அதிகமா வேடிக்க பாக்கறது கடைகள்ள வச்சுருக்கற விளம்பர போர்டுதான். இப்போதான் எல்லாரும் ப்ளெக்ஸ் போர்டு வச்சுடறாங்க, ஆனா அந்த சமயத்துல அதிகமா பெய்ண்டிங்தான். அதுலயும் "குரு ஆர்ட்ஸ்"னு பெயர் போட்ருக்க விளம்பர போர்டு எல்லாமே அப்டியே அச்சுல வார்த்த மாதிரி தத்ரூபமா இருக்கும். திருச்சி வாசிகள் அனைவருக்கும் நல்ல பரிட்சயம் இருக்கும் அவர் ஓவியத்தோட. அவரபத்தி எதுவும் தெரியாது ஆனா அவர் வரஞ்ச ஓவியங்கள் அனைத்திற்கும் நான் ரசிகன்.

(நகர்வலத்தில் திருச்சிராப்பள்ளியின் முந்தைய பதிவுகளை பார்க்க விரும்புவோர்கள் இந்த சுட்டிகள் மூலமாக செல்லலாம் பகுதி 1, பகுதி 2) 

                                                                                                        

திருச்சிராப்பள்ளி பகுதி 3 தொடர்கிறது.

கோவில்கள்னு பாக்கபோனா கும்பகோணம், தஞ்சாவூர், திருச்சி, மதுரை மற்றும் இன்னும் சில ஊர்களில் பல பிரசித்திபெற்ற கோவில்கள் இருக்கு. ஆனா நம்ம நகர்வலத்துல இப்ப பார்த்துகொண்டிருப்பது திருச்சியைப்பற்றி, அதனால சின்ன வயசுல என் தலைல கொட்டி கூட்டிட்டு போன பல கோவில்கள்ல எனக்கு பிடிச்ச ஸ்ரீரங்கம் ரெங்கநாதர் கோவிலைப்பற்றி சொல்றேன்.

திருச்சின்னு சொன்னதுமே பலபேர்க்கு நியாபகம் வர்றது கோவில்கள்தான். அதுல முக்கியமா ஸ்ரீரங்கத்துக்கு ஒரு இடம் கண்டிப்பா இருக்கும். திருச்சி ஜங்ஷன்லருந்து பதிமூணு கிலோமீட்டர், சத்திரம் பேருந்து நிலையத்துலருந்து அஞ்சு கிலோமீட்டர் தூரத்துல இருக்கு ஸ்ரீரங்கம் (பஸ்ல போற தூரம்). சத்திரத்துலருந்து காவிரி பாலம், மாம்பழ சாலை, திருவானைக்காவல் வழியா போகணும். பைக்ல போறதா இருந்தா காவிரி பாலம், மாம்பழ சாலை அடுத்து இடது பக்கம் திரும்பி அம்மா மண்டபம் வழியா போகணும்.  நிமிஷத்துக்கு ஒரு பஸ் இருக்கும் எல்லா பஸ்ஸ்டான்ட்லருந்தும் ஸ்ரீரங்கத்துக்கு. பஸ்ல அந்த காவிரி பாலத்துல வேடிக்கை பாத்துட்டு போறது எனக்கு ரொம்ப பிடிச்ச பிடிச்ச விஷயம். இப்போ பல தமிழ் படத்துல அந்த பாலத்த நீங்க பாக்கலாம். (உ.தா: திருடா திருடி, மலைக்கோட்டை, ஈரம்). அந்த பாலத்துலருந்து காவிரி ஆற்றை பார்த்தால் ரொம்ப அழகா இருக்கும் (தண்ணி இருக்கறப்ப). 

அம்மா மண்டபம்னு சொன்னேனே அது ரொம்ப பிரபலம் திருச்சியில. ஆடிப்பெருக்கு வந்துட்டா அந்த ஏரியாவே கல கட்டிடும். புதுசா திருமணம் ஆனவங்க அதிகமா வந்து பூஜை செய்றத பாத்துருக்கேன். காவிரி ஆற்றுல தண்ணி இல்லாத சமயத்துல மக்கள் எல்லாம் ஆற்றுக்குள்ள மண் தோண்டி ஊற்று ஏற்ப்படுத்தி அதுல பூஜை செஞ்ச மாலை இன்னும் சில பொருட்களை எல்லாம் போடுவாங்க. ஆடிப்பெருக்குக்கு எதனால இவ்ளோ விசேஷம்னு பதிவோட முடிவுல கொடுத்திருக்கற சுட்டிகள பாத்தீங்கன்னா தெரிஞ்சுக்கலாம் (தெரியாதுன்னு சொல்றத எப்டியெல்லாம் சமாளிக்கவேண்டிருக்கு)

இந்த பகுதியெல்லாம் தாண்டி இருக்கு ஸ்ரீரங்கம் ரெங்கநாதர் கோவில். ஸ்ரீரங்கத்துக்கு திருவரங்கம்னு இன்னொரு பெயரும் இருக்கு. பிரம்மாண்டமான கோவில் அது. முதல் கோபுரம் அதாவது ராஜ கோபுரம் முன்னாடி நின்னு பாத்தீங்கன்னா அதுக்கு அடுத்ததா இருக்கற கோபுரங்கள் எல்லாம் அழகழகா தெரியும், செம வியுவ் அது. சாமிய பாக்குறேனோ இல்லையோ கோவில்ல இருக்கற சிலைகள பாத்துட்ருப்பேன். நல்லா ரசனையா செதுக்கியிருப்பாங்க நம்ம சோழர் க்ரூப்ஸ் :) 

கோவில்கள், மண்டபங்கள், சிற்பங்கள், மடப்பள்ளி இந்தமாதிரி விஷயமெல்லாம் ஒன்னும் தெரியாது (இப்ப மட்டும்). எழுத்தாளர் பாலகுமாரனோட நாவல்கள்ள சில ராஜா காலத்து கதைகள் படிக்கறப்ப இந்த விஷயங்கள் எல்லாம் ஓரளவுக்கு தெரிஞ்சது. திரும்பவும் திருச்சி போறப்ப ஸ்ரீரங்கம் போய் மேல சொன்ன விஷயங்கள் எல்லாம் இன்னொருதடவ பாத்துட்டு வரணும்னுருக்கேன். ஸ்ரீரங்கம் போகணும்னு நெனச்சுற்றுக்கவங்க கொஞ்சம் அந்த விஷயங்கள படிச்சுட்டு போனா முழுசா அனுபவிக்கலாம். அதுக்குன்னு தனியா புத்தகங்கள் இருக்கு.

இந்த கோவில்ல முக்கியமான விசேஷம்னா அது வைகுண்ட ஏகாதசி அன்னைக்கு சொர்கவாசல் திறக்கரதுதான். ஒரே ஒருதடவ சின்ன வயசுல போயிருக்கேன் ஏகாதேசிக்கு. அந்த கூட்டத்துல என்னோட அண்ணன் தொலஞ்சு போய் அவன கண்டுபுடிச்சத தவிர வேற ஒன்னும் நியாபகம் இல்ல. சென்னைல வேலை செய்யறப்ப வைகுண்ட எகதேசிய செமையா கொண்டாடுவோம், நாலு படம் பாத்து:)

ஸ்ரீரங்கத்தின் வரலாறு தெரிஞ்சுக்கணும்னா இங்க போய் பாத்துகோங்க, ஆடிப்பெருக்குன்னா என்னனு தெரிஞ்சிக்க இங்க சொடுக்குங்க. வைகுண்ட எகதேசியைப்பற்றி தெரிஞ்சிக்கணும்னா இங்க போகலாம்.  நமக்கு ஜீ.கே கொஞ்சம் வீக்கு. (ஏய் யாருப்பா அங்க? ஜீ.கே மட்டும்தான் வீக்கானு கேக்கறது)

(அனுபவம் தொடரும்...)


நண்பர்கள் அனைவருக்கும் என் இனிய புத்தாண்டு வாழ்த்துக்கள்...